 كتب عادل صموئيل و من ضمن الطفرات الخطيرة فى الموسيقى , زى ماقلت مسبقا ان آلة الكمان وصلت لما هى عليه دلوقتى , الآلة دى لها مساحة صوتية من الحدة الى الغلظ , ودايما فى المعاهد الموسيس قية لازم الطالب يدرس البيانو , لأنك لو نظرت الى البيانو تلاقى عليه حوالى 80 نغمة او اصبع بين الابيض والأسود , ودى بتبدأ من اعلى درجة من الحدة على اليمين وفى النصف متوسطة وتصل لأقصى درجة من الغلظ حتى اليسار , وبيعتبر البيانو ابو الآلات الموسيقية كلها لنه بيحوى كل النغمات او اكبر مساحة صوتية , وكل آلة موسيقية بتمثل جزء منه , ولما نيجى لآلة الكمان نلاقيها بتجيب الجزء الاوسط من البيانو وبتاخد معاها جزء مهم من النغمات الحادة , يعنى فى مساحة البيانو تلاقيها بتاخد من هنا لهنا , مع الاحتياج لآلات اكتر اخترعوا آلة الفيولا , وهى شبه الكمان بس اكبر شوية بتبدأ من جزء من المنطقة الاغلظ فى الكمان وتكمل جزء اغلظ , والفيولا بتتمسك زى الكمان , بعدين اخترعوا التشيللو , واسمه العلمى الفيولونسيل , وهى شبه الكمان بس حجمه كبير وبتحط على الارض والعازف بيعزف عليه وهو جالس , بياخد من جزء من اغلظ ما فى الفيولا ويكمل جزء اغلظ اكتر ,
بعدين اخترعوا الكونترباص , وهو الاكبر حجما والعازف بيعزف عليه وهو واقف , وبياخد برضه جزء من اغلظ ما وصل اليه التشيللو وبيكمل الى اقصى درجة متناهية فى الغلظ , الكونترباص ممكن يتعزف عليه بالقوس او بالنبر بالأصابع وبيعطى ايقاع منغم , الاربع آلات دول اسمهم العائلة الوترية , وفى مجموعهم تلاقيهم هم الاربعة بيعطوا المساحة الصوتية بتاعة البيانو .
وهنا سؤال طيب كتر الآلات دى ليه , يعنى ليها فائدة مهمة ولا حاجات محطوطة على المسرح وزحمة على الفاضى وممكن الاستغناء عنها ؟
ومن هنا نبدأ درس مهم جدا جدا لكل محبى الموسيقى , الموسيقى نوعين , نوع بيحتوى خط لحنى واحد واسمه مونوفونية , وكلمة مونو يعنى واحد , وده تلاقيه فى كل اغانينا الجميلة بتاعة زمن الفن الجميل , يعنى تلاقى فرقة ام كلثوم كل الآلات بتعزف زى بعض نفس اللحن , ونوع اسمه البوليفونية , وكلمة بولى يعنى مزودوج او متعدد , وده تلاقيه فى الموسيقى الكلاسيكية يعنى لما تشوف سيمفونية لبيتهوفن مثلا , تلاحظ ان فيه 12 خط لحنى بتسمعهم مع بعض فى توافق جميل , وده اسمه الهارمونى ( او التوزيع بالبلدى ) يعنى لحن اساسى بتعزفه الكمنجات البريمو , والآلات التانية بتعمل عليه الحان مصاحبة , وتلاقى فيه آلات نحاسية من الوزن التقيل زى الترومبون او الكورونو , مش بتعزف طول الوقت ولكن بتقول جمل او حروف حسب التفاعل اللى فى اللحن , والموضوع حسب طبيعة الآلة نفسها يعنى الكمان مثلا لو قارنتها بالكونترباص , المقارنة بينهم زى المقارنة بين خطوة الارنب او الغزال والفيل , الكمان ممكن تقول نغمات سريعة جدا لكن الكونترباص بيقول نغمات بطيئة وتقيلة , فهنا بيبقى لدى وظيفة وده وظيفة , نفس الموضوع لآلة الفلوت او الكلارنيت والابوا لو قارنتهم بالترومبون والكورنو , فيه آلات نغماتها سريعة والترومبون والكورنو نغمته زى صوت صفارة القطار ,,, يعنى قوية جدا لكن لها توظيف ...
ونلتقى فى العدد القادم
|
