انا بحب ادرس التاريخ من جميع زواياه , يعنى من كتر الدراسة ومن اماكن ومصادر متعددة بحس انى عشت 5000 سنة , ولو انت عشت الفترة دى حاتلاحظ ان التقدم العلمى والتكنولوجى اللى حصل من بعد 1935 والى يومنا هذا يعنى حوالى 80 سنة , حصل فيهم تقدم اد اللى حصل فى العالم خلال ال 4900 سنة اللى قبلهم اكتر من 100 الف مرة , يعنى كان الاختراع البدائى زى وابور الجاز مثلا ممكن ياخد 100 سنة عشان يوصل لشكله اللى فى بيت جدى وتيتة , فى الفترة الحديثة , كل اسبوع ممكن يطلع اختراع يقلب الدنيا , نفس القصة دى حصلت فى الموسيقى بس قبلها بكتير , خلال عصر الباروك فى اوربا يعنى من اكتر من 400 سنة , والعصر ده استمر حوالى 250 سنة , حصل فيه طفرة موسيقية كبيرة جدا , وارتقت صناعة الآلات الموسيقية لأعلى درجة , وانت لما تتفرج على اوركسترا سيمفونى حاتلاقى كل الآلات الموجودة امامك وعلى اختلاف انواعها ,وصلت الى الدرجة دى من الكمال خلال عصر الباروك , يعنى قبله كان لسه ما اخترعوش آلة البيانو , كان فيه جد البيانو واسمه هاربسيكورد وابو البيانو واسمه الكلافيكورد , وفى عصر الباروك اخترعوا البيانو ووصل الى الكمال اللى بنشوفه دلوقتى , نفس القصة فى آلات النفخ ومنها الخشبية زى الاوبوا والكلارنيت , والآلتين دول مستمدين من الناى اللى اخترعه داوود النبى بس طبعا الصناعة تقدمت مليون مرة , يعنى بدل الغابة اصبح جسم الابوا من اسطوانة سميكة من افخر انواع الخشب وهو الابنوس , وبيتميز انه صلب جدا جدا , اولا عشان يتحمل التصنيع الدقيق اللى حايحصل عليه ومايتكسرش اثناء الصناعة , وثانيا خامة خشب الابانوس بتعطى صوت رائع , يعنى فيه انواع خشب صلبة زى البلوط وغيرها بس التجارب اختاروا احلى صوت وهو الابانوس , الاول بتبقى اسطوانة قطرها حوالى اتنين ونصف سم , بعدين بتجوف بآلات خاصة , بس طبعا مش يدوية عشان تبقى زى البوصة الاصلية , بس جدارها اكبر شوية , بعدين بيتعمل فيها الثقوب بهندسة خطيرة وحساب اخطر لأن الثقب لو مش فى مكانه النغمة تبقى نشاز , وايضا لأن النغمة دى شىء عالمى فى كل الدنيا واحدة , اما الابتكار الخطير انهم اخترعوا نظام او تكنيك جيد لسد وفتح الثقوب , غير نظام السد والفك بالأصابع , اخترعوا شىء ساحر اسمه الغمازات , يعنى الثقب بيبقى مسدود بغطاء من معدن وعليه قطعة دقيقة من الكاوتش الخاص , طبعا عشان لما القطعة تقفل وتفتح ما تعملش ضجة مش مطلوبة , ومتصل بالقطعة دى ذراع طويلة من المعدن طولها مش اقل من 15 سم بتصل الى مكان به ضاغط وسوستة , والضواعط دى بتوزع على جسم الآلة , بحيث ان العازف لما بيدرسها , بيحفظ اماكن الضواغط دى , يعنى هو بيمسك الآلة وينفخ فيها , بيمسك الآلة بالعشر اصابع , وكل اصبع له وظيفة , يعنى الاصبع رقم واحد بيضغط على نغمة دو مثلا وهكذا , ولو شفتم فيلم شارع الحب حاتلاقى عبد الحليم حافظ مستخبى فى عشة الفراخ وبيعزف آلة ,,, هى دى آلة الابوا , وكان عبد الحليم بيعزفها لأن فى معهد الموسيقى لازم مع دراسة الغناء ان الطالب يدرس آلة موسيقية ودراسة بجد , عشان وهو بيغنى يبقى عارف علميا النغمات اللى بيقولها ايه بالضبط , مش زى دلوقتى اى واحد يطلع فى مخه يغنى يروح عامل شريط من غيرما يعرف الدو او الرى من صباع الموز ....
ونلتقى فى العدد القادم