كتب عادل صموئيل
ابتدت طفرة تظهر فى صناعة الآلات
الموسيقية , يعنى الآلات الوترية ابتدت تتنوع وتكتر , وكل آلة اختصت بيها دولة من
الدول , لكن لو رجعنا تلاقى بداية كل الآلات ظهرت فى منطقة الشرق الاوسط , بالذات
مصر والدول المحيطة , ولو فكرنا نلاقى ان الحضارات الكبيرة العظيمة ظهرت فى
المنطقة دى , والأديان السماوية ظهرت فى المنطقة دى , والفكرة ان كل الامور
العظيمة بتظهر فى المنطقة التى تقع فى منتصف العالم ان الكل بيمر عليها وبياخد
منها ويؤثر فيها , يعنى لو اختراع ظهر فى مصر ممكن فى وقت قليل العالم كله يعرفه
بعكس الاختراع لو ظهر فى منطقة بعيدة عن خطوط السير الدولية زى روسيا او استراليا
مثلا , ممكن يحتاج من 200 سنة او كتر عشان العالم يعرفه وغالبا مش بيعرفه , لأن
زمان كانت وسائل الإتصال بالمشاهدة المباشرة مش زى دلوقتى , وظهر اختراع القوس
اللى بيعزف على الاوتار , ابتدأ بآلة بدائية تشبه الربابة عندنا , واستمر تطوره
لحد اختراع آلة الكمان , والقوس بيتكون من عصا مشدود عليها كمية من شعر ديل خيل , والسحر
الغريب اللى ماحدش عارف وصلوا له ازاى ساعتها , انك لو جبت القوس وحركته على الوتر
مش حايطلع صوت بتاتاً , لازم يكون الشعر عليه مادة تخشنه , والمادة دى اسمها
قلفونية يعنى هى عبارة عن حجر , هش شوية بيتباع عند الموانين ( محلات الحدايد
والبويات ) والحجر ده لما تحكه فى شعر القوس بيطلع بودرة فيها لزوجة , واللزوجة دى
بتعمل خشانة فى الشعر هى اللى بتطلع الصوت , يعنى لو شفت اى عازف كمان تلاقيه قبل
ما يعزف لازم يحك القوس فى الحجر ده , واختراع الكمان اعطى الموسيقى شاعرية وحمال
جديد , لأن الكمان اقرب صوت الى الصوت البشرى , وطبعا الاختراع لما بيطلع وينتشر ,
بيتطور بسرعة مذهلة , يعنى القوس لازم يكون له طول معين مقاس عالمى , وعشان تحصل
على الطول ده لازم يكون الشعر اطول من كده عشان يتركب بسهولة , واكتشفوا سلالة من
الخيل فى اوربا , شعر ذيله كثيف جدا وطويل جدا , ابتدوا يربوا الخيل ده فى مزارع
من اجل انهم ياخدو شعر ديله كل فترة زى ما بيربوا خراف الصوف وبياخدوا فروتها كل
فترة , وفى اسبانيا اهتموا بالجيتار والمأخوذ عن العود واللى اصله عربى , والجيتار
سى بإسم الجيتار الاسبانى او ( السبانش ) وبيتعزف عليه بطريقتين اما بباطن الاصابع
او بالأظافر , وابتدا ظهور الآلات الإيقاعية المختلفة , واكبر طفرة فى تاريخ
الموسيقى حدثت فى عصر الباروك ( ومن اشهر الموسيقيين فيه باخ ) ده كان من حوالى
500 سنة , وسمى العصر بهذا الإسم لأن الرجال كان الزى الرسمى لهم فى اوروبا
بيلبسوا باروكة , بتشوفها فى المحاكم الاوربية دلوقتى فقط , هى حاجة زى الطربوش
عندنا زمان , فى الوقت ده حصل نضج موسيقى عالى جدا فى اوروبا , ومع الطفرة اكتشفوا
حاجات اكتر , يعنى مرة واحد حسه موسيقى كان معاه قطعة من الحديد , عرضها 2سم
وطولها 5 سم طرقها بشاكوش اخرجت نغمة من النغمات المعروفة , جاب قطعة من الحديد
زيها بس اطول نصف سم اخرجت النغمة التالية , ومن هنا التجارب اخرجت آلة الاكسليفون
, وطلع منه نوعين النوع المعدنى زى اللى فى كل المدارس الإبتدائية , ونوع ارقى بدل
الحديد قطع من خشب الابانوس وبيستعمل فى الاوركسترات العالمية .
والى العدد القادم