أوتار الفن | عادل صموئيل يكتب " الفن والخلق 2 " - 23 من أغسطس 2011 - الأقســام الرئيسيــة

كتب عادل صموئيل

ولما نرجع للأرض ونشوف الجمال اللى عليها الجبال والبحار والأشجار والورود , وفى البحر الاسماك الملونة ملايين الانواع , تمسك واحدة تدرسها بدقة تلاقيها مرسومة بعبقرية , اكيد حتقول تبارك الله فيما خلق , والفن عمرة ما يبعدنا عن الله , يعنى انت لماتسمع موسيقى جميلة بتقول الله , ولما الله خلق البشر وخلق الحيونات , من عليها بحواس , خمس حواس , ولكن تختلف بين الانسان وبين الحيوان , يعنى حاسة الشم عند الحيوان شديدة جدا جداً بس مركزة فى حاجة واحدة , انه فى الغابة بيشم الفريسة اللى عايز يصطادها من على بعد كذا كيلو الهوا بيحمل له رائحتها , لكن تعالى للأنسان وشوف المنن اللى انعم عليه الله بها فى حاسة الشم , انه بيشم الورد الجميل وردة وردة والعطور الجميلة , والاكل اللذيذ بيشم ريحته قبل ما ياكله , تخيل لما تكون جوعان وتفوت على محل كبابجى وتشم رائحة الشوى , وحاسة التذوق يعنى عندك الاسد مش بيتذوق غير طعم اللحم النىء فقط , حط قدامه طبق كباب ولا سكالوب مالوش فيه , لكن تعالى شوف الله انعم عليك بمتعة انك تاكل كام صنف طعام وفاكهة ومشروب , وحاسة النظر بتميز كل الجمال اللى فى الكون حاجة حاجة , والسمع ,,, يعنى الله اسكن البشر على الكوكب الجميل وخلق لهم الجمال كله , وانعم على بعض البشر بالمواهب , والإنسان الموهوب هو اللى بيمعل خلق فنى او ابداع , الإبداع ده جه منين ؟ مستوحى مما خلقه الله , يعنى الرسام لما يرسم منظر طبيعى , مش معقول واحد ساكن فى الصحراء طول عمره حايرسم شجر لأنه ماشافوش اصلا , زى الطفل الأطرش بالطبيعة لازم يطلع اخرس , لأنه بيتكلم ازاى ؟ انه بيسمع اصوات بيقلدها , الفنان التشكيلى لما بيتعلم الرسم لازم يدرس الجمال اللى فى الطبيعة والاسماك الملونة وكل شىء , وسبحان الله تلاقى حاجة غريبة عمرك شفت اطيور اللى بتصطاد سمك , تلاقى الاسماك اللى بتطلع على سطح البحر واللى بيشوفها الطيور تنزل تخطفها لونها زى البورى والبلطى يعنى معمولة للأكل , لكن الاسماك اللى معمولة للفرجة طبيعة خلقها انها لازم تعيش فى العمق , الإنسان اللى ماعندوش حاسة فنية , بيبص على السمك اللى بيتتاكل بس لكن عمره ما يبص على سمك الزينة وهنا اكيد فاته كتير اوى , والطيور ملايين الانواع والألوان والأشكال بين الفن الهادى والفن الكبير زى الطاووس , ولما عشق الانسان الطبيعة وعشق الفن , وبدأ الإبداع البشرى ابتدا الفن ياخد مجرى ابداعى اكتر , انا مرة شفت رسام بيرسم لوحة لحمار قدامه , بس رسام مبدع , بصيت ع الحمار كويس وركزت فى اللوحة حسيت ان الحمار المرسوم طبيعى اكتر من الحمار الاصلى , يعنى الرسام عمل له نظرة فى عينيه , ممكن تحس انه عايز يقول حاجة يعنى كل يوم فول فول مفيش طعمية .... او نظرة جانبية فيها عتاب لصاحبه بيقول له انتى بتضربنى اوى بالكرباج ليه مع انى ممكن افهم انت عايز ايه من لمسة , واللغة الحميرى 3 كلمات مش محتاجة يعنى شى وحاه ويس , بيبقى الحمار وصاحبة مين اللى بجد غبى فيهم ,,,, واخطر شىء فى الفن انه زى ماقلت لازم تكون فيه ثقافة مصاحبة , والثقافة لازم تكون عالية , لأن الثقافة لما بتكون عالية بيبقى الفن لغته عالية , وبيبقى الجمهور متقبل عالى الفكر , ولو انحدرت الثقافة بالتبعية الفن بينحط , يعنى ام كلثوم غنت من شعر شوقى : ومانيل المطالب بالتمنى ولكن تؤخذ الدنيا غلاباً
كلمة قول مأثور يعنى تعتبرها حكمة تعتبرها خارطة طريق وممكن تعلقها على الحائط فى اى مكان محترم , لما الحكومة البائدة اهملت الثقافة وصل الغناء للخيار الخيار الخيار
يعنى واحد بتاع خيار بدل ما يقف فى السوق وينادى ع الخيار بقى يعمله شريط ويبيعه بملايين الجنيهات علماً بان الخيار معمول عشان السلاطة مش عشان نغنى له
وللحديث بقية ومرحبا بالأسئلة مع اطيب تحياتى