كتب عادل صموئيل
أحبائي ونحن نحتفل بصدور العدد الاول من المجلة اتقدم بأطيب التهانى للإدارة والاعضاء , واتمنى انها تكون مجلة متميزة , فى البداية احنا هنا فى صفحة الفن , والفن ده كلمة كبيرة جدا , يعنى هو المدرسة الحقيقية للأمم , لأننا بنتعلم منه حاجات تختلف عن اللى بنتعلمه فى المدرسة , لأن الاخيرة مفروضة علينا , يعنى لازم تدخل المدرسة وتتعلم كل المنهج حتى لو مادة مش بتحبها , لكن الفن قدامك حاجات كتير انت بتتعلم او بتحب اللى انت بتحبه فعلا ,او الشىء اللى بيستهويك , والفن هو عنوان الحضارات يعنى اى حضارة بنعرفها من فنونها , عندك ناس زى التتار معروفين فى التاريخ بإنهم بيخربوا ويحرقوا المدن , من المؤكد ان ماعندهمش لافن ولاتذوق فنى , انت لو عندك تذوق فنى من المستحيل حاتتعمد تحرق او تكسر حاجة , وعشان نتكلم عن الفن لازم نتكلم عن التعليم الصح , يعنى مثلا مشكلة التعليم عندنا انك لو دخلت اولى ثانوى مثلا فيه مادة الفيزياء , تلاقى المدرس اول حصة دخل فيك شمال وابتدا يتكلم فيزيا على طول وتلاقى السبورة اتملت كتابة وانت لسه مش مهيأ تتفهم الموضوع الجديد ده , تانى حصة بيكمل اللى قاله وم بيهمه انت فاهم ولا لأ , هنا تضطر تحفظ فقط مش تفهم , لكن انا احب الناس تفهم كويس اوى , وعشان نتفهم يعنى ايه فن لازم نرجع للجذور , الفن بيبدأ من عند الله سبحانه وتعالى , هو اعظم خالق واعظم مبدع واعظم فنان , يعنى لو تدقق بكل الوسائل , الرؤيا والتحليل الدراسة ان اى شىء جميل تشوفه من خلق الله مش معمول كده زى ماطلع ولكن بخلق وإبداع غية فى الدقة وغاية فى الوعة والجمال , اول شىء المكان ... انا شفت زمان مع الدكتور فاروق الباز عالم الفضاء صور المجموعة الشمسية من بعيد , تلاقى الكواكب عبارة عن شوية كرات , كرات كبيرة زى كرة القدم وكرات صغيرة زى كورة التنس والبنج بونج , كلهم لونهم رمادى لون التراب , لكن فى الوسط كرة اسمها كوكب الارض , لو تدقق فيها , تلاقى الوان تخبل العقل يعنى تحفة فنية , طبعا بالنسبة للكواكب التانية الفرق واضح اكيد حاتقول عايز دى , وهنا الله سبحانه وتعالى اختار ان البشر يعيشوا على الكوكب الجميل ده لأنه جميل ويحب الجمال , يعنى لما ييجى واحد يفجر قنبلة ويعمل خراب هو كده ضد ارادة الله , لو كان الله بيحب المنظر التخريبى ده كان احتار الناس على اى كوكب تانى كنا حانلاقيها خرابة جاهزة مش حانتعب عشان نحولها الى خرابة , يعنى كان سهل جدا يعمل على كوكب المشترى كام نهر وشوية اكسجين ,وهنا احكى لكم قصة حصلت اوائل الستينات , غز ماكان روسيا وامريكا بيتخانقوا على اى وكل حاجة وابتدأ صراع الفضاء ومين يطلع القمر الاول ولما نجحت امريكا ونزلوا على القمر لقو خرابة , يعنى رواد الفضاء قالوا لقيناه كوكب مقرف قذر شوية حجارة وتراب , ومن ساعتها ماحدش فكر يروحه تانى حسه انه حلو من بعيد لكن مايستاهلش تصرف مليارات الدولارات عشان تروحه تانى , وللحديث بقية ونلتقى مع اطيب تحياتى
|