أوتار الفن | عادل صموئيل يكتب " الفن والحياة " - 10 من سبتمبر 2011 - الأقســام الرئيسيــة

كتب : عادل صموئيل

بعد ما اتكلمنا عن الفن والخلق .. نتكلم عن الفن والحياة او الفن فى الحياة .. واساس تفكيرى فى ما سأقول
دعاوى تيارات عايزة تقول ان الفن حرام .. وفكرت ان الفن اد ايه متداخل فى الحياة واكتشفت ان الفن هو الشريان اللى خلى الانسان خرج من العصر الحجرى الى التقدم والمدنية , بالضبط زى مايكون مكان صحراوى وامتد اليه شريان من الماء خلاه اصبح حدائق جميلة .. ونظرت فى الحياة حوالينا لقيت ان الفن داخل فى كل حاجة او اى حاجة انت بتشوفها ممكن تكون مش واخد بالك من ده , لكن بعد كلامى ممكن نظرتك تبقى اعمق بكتير , اكتشفت ان اى شىء قدامك معمول فى مصنع او ورشة , وكل مصنع فيه قطاع صناعة يعنى الجهاز اللى بينتج المصنوع , يعنى مثلا مصنع سيارات , ده عبارة عن مدينة كبيرة بتعمل السيارات , اهم شىء فيه الفن .. يعنى قطاع مهم من امهر المصممين والرسامين بيرسموا كل حتة فى السيارة , يعن المهندسين بيعملوا المواصفات الهندسية والفنانين بيصمموا شكلها , مش بس الشاسيه ولا الشبكة ولا الفوانيس حتى المراية والتابلوه , ومن جوا شكل الكراسى وكل سنتى لازم يكون جميل حتى الدواسة اللى على الارضية , الاكر كله . وبيترسم عشرات التصميمات الجميلة ولجنة على اعلى مستوى بتختار من التصميمات دى اجملها , بحيث انك لما تختار عربية بحجم معين او سعة معينة كلهم زى بعض من حيث الكفاءة , لكن انت بتفكر كتير وتتأمل انه احلى عربية , طيب لو مفيش فن ؟ كانت العربية حاتبقى حاحة مالهاش شكل يعنى كشك سجاير او صفيحة زبالة او عشة فراخ فيه 4 عجلات وشباكين وخلاص ... ولو تاملت اكتر تلاقى الفن فى كل حاجة شكل مفاتيح النور والحنفيات والكراسى , ورسومات قماش الملابس والمفروشات , حتى اكياس الشيبس مثلا , انت مش بتشترى البطاطس ولكن بيشدك الكيس الاحلى شكلا , حتى الصابونة بتختار من عشرين صنف اللى شكل الورقة بتاعتها احلى .... الفن مش غنوة جميلة بس .. لكن لوحة جميلة ومنظر جميل ...اى شىء قدامك بيبقى جميل كل ده مجتمع عشان يديك حاسة تخليك تتمتع باللوحة الجميلة او الموسيقى الجميلة ,,, حتى السلاح ,,, كان زمان اوى حتة حديدة بتقتل لكن مع ازدياد تأثير الفن على الناس واحساسهم بيه بقى اهم حاجة يبقى شكله جميل , وده اكيد فيه فنان تشكيلى بيرسمه , عشان منعشر مسدسات تختار احلى واحد , انت لو قاعد مسترخى على كرسى وثير , وقدامك لوحة منظر طبيعى مثلا .. المنظر بينقلك من الغرفة بيخليك تفكر انك جوا المنظر ده وشوف خيالك ممكن يوصل لإيه يعنى ممكن تتخيل انك على بحر او فى غابة والمخ بيشتغل .. لو شلنا المنظر ده حاتبص على الحائط يعنى حاتبص على صفر .. بالتدريج حاتلاقى نفسك بتفكر فى صفر ... فى ولا حاجة وهنا المخ بيتوقف .. ملكة التخيل اللى بتوصل للإبداع بتتوقف .. وبيوصل الانسان انه ماعندوش سيادة قراره ولكن لازم ينقاد ورا حد يسحبه .... والفن لما ابتدا يدخل فى كل كل حاجة شفنا اشكال جديدة يعنى حتى الكتب الدراسية بقى مهم جدا يبقى شكلها حلو من بره ومن جوا , غير زمان كان مالوش لاشكل ولاطابع , حتى الادوات المكتبية , يعنى كل حاجة شكلها حلو يفتح النفس وانت بتذاكر ,
وبعد ماتاملت لأقصى درجة تأمل ظهر سؤال : طيب ايه الشىء اللى مافيهوش فن او لمسة فنية او لمسة جمالية , احترت كتير جدا يعنى ممكن نقول اكوام الزبالة المنتشرة فى الشوارع لكن دى حالة وقتية ممكن بكرة لو عايزين يشيلوها , وبعد ماغلبت فى التفكير لقيت الاجابة ... من شهر فى البيت عندى قالوا عايزين نشترى تلاجة جديدة , رجنا محل محترم لقيت فى حدود المبلغ اللى حددته اكتر من ست انواع تلاجات , تفتح التلاجة من جوا تلاقيها جميلة تجنن , تفتح التانية تلاقيها احلى , وانا عشان فنان الحكاية دى بتتعبنى يعنى اشترى دى ولا دى لأن مش معقول اشتريهم كلهم .. وبعدين الخبث اللى بيعملوه اصحاب المصانع ان معكل تلاجة بيدوك كتالوج فة صورة ملونة للتلاجة وهى مليانة ماكولات ومشروبات , لدرجة ان سألت صاحب المحل انا حاشترى التلاجة دى بس فين الاكل اللى جواها ؟ قال لى اكل ايه قلت له اللى فى الكتالوج بتاعها مش انا بشترى الحلجة اللى فى الكتالوج زى ماهى ؟ وبالذات الديك الرومى المحمر ؟ الراجل ضحك وقال انت تاخد التلاجة دلوقتى بعدين حانبعت لك الاكل عشان لسه حايطبخوه , المهم وصلت لإجبة السؤال ايه الحاجة اللى بتتعمل من غير مايكون فيها فن اصلاً والتلاجات هى اللى اوحت لى بالفكرة ... فاكريرن السنة اللى فاتت مسلسل بطولة يسرا كانت بتشتغل طبيبة شرعية فى مشرحة زينهم ؟ اكتشفت ان تلاجات حفظ الجثث هى الحاجة الوحيدة اللى معمولة متعمد مافيهاش فن , يعنى ادراج مربعة وخلاص ,
والمكان كله فى قلب بعضه مكان مقبض بغيض ... لأن ماحدش بيروحه غير فى يوم اسود
حتى اللى بيشتغلوا فيه لازم يكونا على طول مكتئبين لأن طبيعة شغلهم كده , لو فى مكان يفتح النفس كانوا مش حايشتغلوا الشغلة الكئيبة جدا دى , يعنى اقصد المكان كله فى قلب بعضه لازم يكون كئيب , اكتشفت اللى اللى عايز نبطل فن والفن بهجة الحياة عايزنا نسيب كل الحاجات الحلوة اللى فى الدنيا ونروح نقضى النهار فى مشرحة زينهم

ونلتقى