بقلم : عادل صموئيــــل
ولما نتكلم عن الحاجة الرابعة فى الإختراعات وهى تكلمة او توابع لإختراع
سابق , كنا واقفين عند السلم الموسيقى الخماسى , وكل نغمة كان لها اسم ,
والعازفين او المهتمين بالموسيقى بيفرقوا بين النغمات , يعنى يسمع يقول دى
النغمة الثالثة , زى ما انت لو عندك اتنين اخوات كل واحد عنده عربية بتميز
صوت كلاكس مين من غير ماتشوفها , ده لأن كل كلاكس بيمثل نغمة موسيقية ,
والنغمة فى الفزياء بتمثل تردد , يعنى اهتزاز بيعمل صوت , يعنى نغمة دو
مثلا بتمثل على اجهزة القياس 456 ذ/ث , يبقى اى شىء بيعمل تردد 456ذ/ث تبقى
دو , وهكذا لباقى النغمات , والصدفة بتعمل دور كبير فى الإختراعات , يعنى
مرة واحد بيفهم فى النغمات اللى قلنا عليها , كان سلك معدنى مشدود على حاجة
, وبدون قصد طرق السلك بأصبعه او اى شىء طلع النغمة الثالثة من السلم
الخماسى اللى هو حافظه , طبعا ظاهرة مهمة جدا , ومن حسن الحظ ان اللى عمل
كده انسان عنده حس موسيقى , لو انسان عادى مش حاتفرق معاه , لما حب يجرب
على سلك مشدود تانى وجد صوت تانى , اكتشف ان السلكين مش مشدودين بنفس القوة
, يعنى واحد منهم مرخى عن التانى شعرة صغيرة , ومن هنا اكتشفوا الاوتار ,
يعنى انت لو شديت خمس اسلاك جنب بعض على سطح واحد , وشديت السلك الاول لحد
مايديك تردد او صوت النغمة الاولى , بعدين تشد السلك التانى لكن سنة اكتر
لحد مايديك تردد او صوت النغمة الثانية وهكذا , ومن هنا وصلنا للعد
التنازلى لبدء اختراع اول آلة موسيقية وترية , بس كان فيه مشكلة , ان كل
التجارب اللى قلت عليها كانت على سطح مكتوم يعنى فوق لوح خشب او ترابيزة
مثلا , وهنا الصوت كان مخنوق طبعا ومنخفض جداً , مش زى صوت الناى اللى ممكن
ناس كتير تسمعه , ومن هنا جاءت فكرة الصندوق الرنان , يعنى يتعمل جهاز او
تشكيل ما بحيث انك لما تشد الاوتار او الاسلاك دى ( ولحد دلوقتى كانت
الاسلاك من خامة واحدة او نوع واحد من السلك بيتعمل منه كل الاوتار ) وجدوا
ان الصندوق المجوف الرنان من الخشب الرقيق جدا ( اللى زى العود مثلا )
بيخلى الصوت اعلى كتير ثانيا جميل جدا , وابتدى التطوير اكتر , واول آلات
وترية بدائية كانت حاجة شبه الهارب وده بتتشد الاوتار على جهاز قائم , به
صندوق رنان من اسفله ( ممكن تشوفه فى اغنية بلاش عتاب بتاعة عبد الحليم
وبنت بتعزف عليه بإيدها من الناحيتين ) طبعا الاول كان بدائى , ولما ابتدا
الاحتياج لنغمات اكتر وذلك تبعا لزيادة جمال الالحان وزيادة خصوبة الفكر
والإبداع عند الملحنين , ابتدأ عدد الاوتار يكتر , وهنا ظهرت مشكلة خطيرة ,
ان نوع السلك الواحد بيديك مساحة لحد عدد معين من النغمات , يعنى لو شديته
اكتر عشان يديك نغمات احد ممكن بيتقطع , او رخيته اكتر عشان يديك نغمات
اغلظ عند درجة معينة بيبقى زى الاستك السايب يعنى ما يطلعش صوت , ( ولاحظوا
اننا لسه فى مرحلة وتر واحد يديك نغمة واحدة ) , ابتدأ التفكير ان السلك
الاول اللى كنا بنستعمله يبقى فى منتصف الآلة بعدين لو عايز نغمات احد
بتركب سلك ارفع , ولو عايز نغمات اغلظ بتركب سلك اغلظ , يعنى لما تشوف
الآلة , تلاقيها بتبدا بأسلاك او اوتار رفيعة جدا , ثم اسلاك متوسطة , ثم
اسلاك اغلظ والى الحلقة القادمة مع اطيب تحياتى
|